ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್: ಭಾರತದ ಫೈನಲ್ ಹಾದಿಯಲ್ಲಿ ಹತ್ತಾರು ಲೆಕ್ಕಾಚಾರ! ಪಾಕ್ ಗೆದ್ದರೆ ಯಾರಿಗೆ ಅನುಕೂಲ?

ಆಸ್ಟೇಲಿಯಾ ವಿರುದ್ಧ ಪರ್ತ್ ನಲ್ಲಾದ ಸೋಲು ಟೀಂ ಇಂಡಿಯಾವನ್ನು ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಅಂಕಪಟ್ಟಿಯಲ್ಲಿ 3ನೇ ಸ್ಥಾನಕ್ಕೆ ತಳ್ಳಿದರೆ, ಶ್ರೀಲಂಕಾ ವಿರುದ್ದ ದಕ್ಷಿಣ ಆಫ್ರಿಕಾ ಗೆಲುವು ಸಾಧಿಸಿರುವುದು ಅದನ್ನು 1ನೇ ಸ್ಥಾನದಲ್ಲಿ ಕುಳ್ಳಿರಿಸಿದೆ. ಪಂದ್ಯದಿಂದ ಪಂದ್ಯಕ್ಕೆ ಅಂಕಪಟ್ಟಿಯಲ್ಲಿನ ಸ್ಥಾನಮಾನಗಳು ಬದಲಾಗುತ್ತಿದ್ದು ಅಂತಿಮವಾಗಿ ಫೈನಲ್ ಆಡುವ ಎರಡು ತಂಡಗಳು ಯಾವುವು ಎಂಬುದು ತೀವ್ರ ಕುತೂಹಲ ಕೆರಳಿಸಿದೆ.

ಕೇವಲ 2 ತಿಂಗಳ ಹಿಂದೆ ಈ ಪರಿಸ್ಥಿತಿ ಇರಲಿಲ್ಲ. ಅಂಕಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿದ್ದ ಭಾರತ ಮತ್ತು 2ನೇ ಸ್ಥಾನದಲ್ಲಿದ್ದ ಆಸ್ಟ್ರೇಲಿಯಾಗಳೇ ಫೈನಲ್ ಆಡುವ ತಂಡಗಳು ಎಂದು ಬಹುತೇಕ ಎಲ್ಲರೂ ಅಂದುಕೊಂಡಿದ್ದರು. 75ಕ್ಕೂ ಅಧಿಕ ಸರಾಸರಿ ಅಂಕ ಕಲೆ ಹಾಕಿದ್ದ ಭಾರತದ ತಂಡದ ಹತ್ತಿರಕ್ಕೂ ಯಾರೂ ಸುಳಿಯುವ ಸಾಧ್ಯತೆ ಇರಲಿಲ್ಲ. ಒಂದು ವೇಳೆ 2ನೇ ಸ್ಥಾನದಲ್ಲಿದ್ದ ಆಸ್ಟ್ರೇಲಿಯಾಕ್ಕೆ ಕುತ್ತು ಬರಬಹುದೇ ಹೊರತು ಭಾರತ ಸುರಕ್ಷಿತ ಎಂಬುದೇ ಎಲ್ಲರ ಲೆಕ್ಕಾಚಾರವಾಗಿತ್ತು. ಪರಿಸ್ಥಿತಿಯೂ ಹಾಗೆಯೇ ಇತ್ತು.

ಭಾರತ ತಂಡಕ್ಕೆ ಆ ಸಂದರ್ಭದಲ್ಲಿ ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಗೆ ಮುಂಚಿತವಾಗಿ ಉಳಿದಿದ್ದುದು ಕೇವಲ ಎರಡೇ ಸರಣಿಗಳು. ಒಂದು ಪ್ರವಾಸಿ ನ್ಯೂಜಿಲೆಂಡ್ ವಿರುದ್ಧ ತವರಿನಲ್ಲಿ 3 ಪಂದ್ಯಗಳ ಟೆಸ್ಟ್ ಸರಣಿ. ಎರಡನೇಯದು ಆಸ್ಚ್ರೇಲಿಯಾದಲ್ಲಿ 5 ಪಂದ್ಯಗಳ ಬಾರ್ಡರ್ ಗವಾಸ್ಕರ್ ಟ್ರೋಫಿ ಸರಣಿ. ನ್ಯೂಜಿಲೆಂಡ್ ವಿರುದ್ಧ ಸುಲಭದಲ್ಲಿ ಗೆದ್ದು, ಆಸ್ಟ್ರೇಲಿಯಾ ಸರಣಿಯಲ್ಲಿ ಎರಡು ಪಂದ್ಯ ಗೆದ್ದರೂ ಭಾರತದ ಫೈನಲ್ ಪ್ರವೇಶ ಅಬಾಧಿತ ಎಂಬಂತಿತ್ತು ಪರಿಸ್ಥಿತಿ.

ಆದರೆ ನ್ಯೂಜಿಲೆಂಡ್ ತಂಡ ಎಲ್ಲಾ ಲೆಕ್ಕಾಚಾರಗಳನ್ನು ಉಲ್ಟಾಪಲ್ಟಾ ಮಾಡಿತು. ಯಾರೂ ಊಹಿಸದ ರೀತಿಯಲ್ಲಿ ಸರಣಿಯನ್ನು 3-0 ಅಂತರದಿಂದ ಕ್ವೀನ್ ಸ್ವೀಪ್ ಮಾಡಿದ ನ್ಯೂಜಿಲೆಂಡ್ ಭಾರತದ ಅಂಕಗಳನ್ನು ಕಸಿದುಕೊಂಡಿತು.

ಹೀಗಾಗಿ ಆಸ್ಚ್ರೇಲಿಯಾದಲ್ಲಿ ಭಾರತ ತಂಡದ ಮೇಲೆ ಅತೀವ ಒತ್ತಡ ಸೃಷ್ಟಿಯಾಗಿದೆ. ಪರ್ತ್ ನಲ್ಲಿ ಗೆದ್ದರೂ ಅಡಿಲೇಡ್ ನಲ್ಲಿ ಸೋತಿರುವುದು ದೊಡ್ಡ ಹಿನ್ನಡೆಯನ್ನುಂಟು ಮಾಡಿದೆ. ವಿಶ್ವ ಟೆಸ್ಟ್ ಚಾಂಪಿಯನ್ ಶಿಪ್ ಫೈನಲ್ ಮುಂಚಿತವಾಗಿ ಭಾರತಕ್ಕೆ ಉಳಿದಿರುವುದು ಕೇವಲ 3 ಪಂದ್ಯಗಳಷ್ಟೇ. ಆ ಮೂರರಲ್ಲಿ ಮೂರನ್ನು ಗೆದ್ದಲ್ಲಿ ಭಾರತ ಖಂಡಿತವಾಗಿಯೂ ಸೇಫ್. ಇಲ್ಲವಾದಲ್ಲಿ? ಮುಂದಿನ ದಾರಿ ಏನು? ಇಲ್ಲಿದೆ ಲೆಕ್ಕಾಚಾರ.

ಸೋಮವಾರವಷ್ಟೇ ಮುಗಿದಿರುವ ಶ್ರೀಲಂಕಾ ವಿರುದ್ದ ಸರಣಿಯನ್ನು 2-0 ಅಂತರದಿಂದ ಗೆದ್ದುಕೊಂಡಿರುವ ದಕ್ಷಿಣ ಆಫ್ರಿಕಾ ಸದ್ಯ ಅಂಕಪಟ್ಟಿಯಲ್ಲಿ 63.33 ಸರಾಸರಿ ಅಂಕ ಹೊಂದಿದ್ದು ಮೊದಲ ಸ್ಥಾನದಲ್ಲಿದೆ. ಹರಿಣಗಳು ಇನ್ನು ಪ್ರವಾಸಿ ಪಾಕಿಸ್ತಾನದ ವಿರುದ್ಧ 2 ಟೆಸ್ಟ್ ಗಳ ಸರಣಿಯನ್ನು ಆಡಬೇಕಿದೆ.

ಆ ಸರಣಿಯಲ್ಲಿ 1 ಪಂದ್ಯ ಗೆದ್ದರೂ ಆಫ್ರಿಕಾ 1ನೇ ಸ್ಥಾನ ಗಟ್ಟಿಗೊಳ್ಳಲಿದೆ. ಒಂದು ವೇಳೆ ಸರಣಿ 1-1 ಸಮಬಲಗೊಂಡಲ್ಲಿ ಆಫ್ರಿಕಾ 61.11 ಸರಾಸರಿ ಅಂಕಗಳೊಂದಿಗೆ ಅಭಿಯಾನ ಸಮಾಪ್ತಿಗೊಳಿಸಲಿದ್ದು ಆಗ ಭಾರತ ಮತ್ತು ಆಸ್ಟ್ರೇಲಿಯಾ ತಂಡಗಳಿಗೆ 1ನೇ ಸ್ಥಾನಕ್ಕೇರಲು ಅವಕಾಶವಿದೆ.

ಒಂದು ವೇಳೆ ಎರಡೂ ಪಂದ್ಯಗಳು ಡ್ರಾ ಆದಲ್ಲಿ ಆಗ ದಕ್ಷಿಣ ಆಫ್ರಿಕಾ ತಂಡದ ಸರಾಸರಿ ಅಂಕ 58.33 ಆಗಲಿದೆ. ಈ ವೇಳೆ ಭಾರತ ತಂಡ ಆಸ್ಟ್ರೇಲಿಯಾವನ್ನು 3-2 ಅಂತರದಿಂದ ಸೋಲಿಸಬೇಕಾಗುತ್ತದೆ. ಆ ಬಳಿಕ ಆಸ್ಚ್ರೇಲಿಯಾ ತನ್ನ ಮುಂದಿನ ಸರಣಿಯಲ್ಲಿ ಶ್ರೀಲಂಕಾವನ್ನು 2-0 ಅಂತರದಿಂದ ಸೋಲಿಸಿದಲ್ಲಿ ದಕ್ಷಿಣ ಆಫ್ರಿಕಾ ಫೈನಲ್ ಸ್ಪರ್ಧೆಯಿಂದ ಹೊರಬೀಳಲಿದೆ. ಪಾಕಿಸ್ತಾನ ತಂಡ ಎರಡೂ ಪಂದ್ಯಗಳನ್ನು ಗೆದ್ದರೆ ಭಾರತದ ಫೈನಲ್ ಪ್ರವೇಶ ಸುಲಭವಾಗಲಿದೆ.

ಇನ್ನು ದಕ್ಷಿಣ ಆಫ್ರಿಕಾ ತಂಡ ಪಾಕಿಸ್ತಾನದ ವಿರುದ್ಧ ಸರಣಿಯನ್ನು 1-0 ಅಂತರದಿಂದ ಗೆದ್ದುಕೊಂಡಲ್ಲಿ ಅವರು ಫೈನಲ್ ಪ್ರವೇಶಿಸಲು ಆಸ್ಟ್ರೇಲಿಯಾದ ಮೇಲೆ ಅವಲಂಬಿತರಾಗುತ್ತಾರೆ. ಆಸ್ಚ್ರೇಲಿಯಾ ಇನ್ನುಳಿದಿರುವ 3 ಪಂದ್ಯಗಳಲ್ಲಿ ಭಾರತವನ್ನು 2ರಲ್ಲಿ ಸೋಲಿಸಿದರೆ ಅದು ಆಫ್ರಿಕಾಗೆ ವರದಾನ. ಅಥವಾ ಭಾರತ ಒಂದು ಗೆಲುವು ಮತ್ತು ಒಂದು ಡ್ರಾ ಕೂಡ ಆಫ್ರಿಕಾದ ಫೈನಲ್ ಯಾತ್ರೆಗೆ ಬಹಳ ಸಹಾಯ ಮಾಡಲಿದೆ.

ಪ್ರಸ್ತುತ 45.45 ಸರಾಸರಿ ಅಂಕಗಳನ್ನು ಹೊಂದಿರುವ ಶ್ರೀಲಂಕಾ ತಂಡ ಆಸ್ಟ್ರೇಲಿಯಾ ತಂಡದ ವಿರುದ್ದ ಉಳಿದಿರುವ 2 ಟೆಸ್ಟ್ ಪಂದ್ಯಗಳನ್ನು ಗೆದ್ದರೂ ಅಂತಿಮವಾಗಿ ಗಳಿಸಿವುದು 53.85 ಸರಾಸರಿ ಅಂಕಗಳನ್ನು. ಆಗ ಅವರು ಅವರು ಬೇರೆ ತಂಡಗಳ ಫಲಿತಾಂಶದ ಮೇಲೇ ಅವಲಂಬಿಸಬೇಕಾಗುತ್ತದೆ. ಹೀಗಾಗಿ ಶ್ರೀಲಂಕಾ ಫೈನಲ್ ಹಾದಿ ಬಹಳ ಕಠಿಣ.

ಹೀಗಾಗಿ ಸದ್ಯಕ್ಕೆ ಫೈನಲ್ ರೇಸ್ ಒಂದು ರೀತಿಯಲ್ಲಿ ಭಾರತ- ದಕ್ಷಿಣ ಆಫ್ರಿಕಾ- ಆಸ್ಟ್ರೇಲಿಯಾ ನಡುವಿನ ತ್ರಿಕೋನ ಸರಣಿಯ ರೂಪ ಪಡೆದುಕೊಂಡಿದೆ ಎನ್ನಬಹುದು.